O Concello de Ourense inicia, co Xoves de Comadres, as actividades do Entroido 2023

O Xoves de Comadres, que xuntou esta mañá na Praza Maior 250 alumnos de Educación Primaria de cinco centros de ensino da cidade -CEIP Irmáns Villar, CEIP Manuel Sueiro, CEIP Mestre Vide, CEIP As Mercedes e CEIP Amadeo Barroso- marcou o inicio das actividades de Entroido 2023 organizadas polo Concello de Ourense. Os nenos levaron as comadres confeccionadas os días previos coa axuda de especialistas e celebraron a tradicional loita de mecos.

Porén, o día grande dos centros educativos da cidade será mañá, venres 17, cos diferentes desfiles escolares. O máis numeroso terá lugar no centro da cidade e sairá ás 11:30 h da Praza Maior. O alcalde dirixirase aos 1.500 participantes antes do comezo da actividade, que irán acompañados por dúas charangas e unha batucada.

Percorrido: Praza Maior - rúa Valentín Lamas Carvajal - rúa do Paseo- rúa Parque San Lázaro - rúa de Santo Domingo - Praza do Ferro - rúa da Paz - Praza Maior (regreso previsto ás 13.00 h).

Os 10 centros de ensino que participan irán disfrazados tematicamente: CEIP As Mercedes, de pintores/as; CEE O Pino, de animais; CEIP Manuel Luís Acuña, de roqueiros/as; CPR Divina Pastora, de fondo mariño, a granxa e xeados; CPR Luis Vives, de Vives polo mundo; CPR Mª Auxiliadora, de personaxes históricos; CPR Concepción Arenal, de magos; CPR San Xosé, de Pablo Picasso; CPR A Purísima, de universo; CPR Maristas, de fondo mariño.

Ademais do desfile principal, haberá outros con saída ás 11:00, 12:00 e 12:30 horas respectivamente desde diferentes centros educativos da cidade.

Entroido 2023. A festa do Entroido 2023 continuará desde as 19:00 horas coa actuación de Verano Azul Band, o desfile de Entroidos tradicionais, ás 20:00 horas, e os concertos de Festicultores -00:30 h- e as charangas.