Barakaldo edadismoaren aurkako aitzindaria izan dela aitortu du Hiri Lagunkoien Nazioarteko Foroak

Barakaldok aitortza jaso du edadismoaren aurka egindako lanagatik. Egunotan Donostian egiten ari den Adinekoekin Hiri Lagunkoien Nazioarteko Foroan parte hartzen ari diren hirietako eta nazioarteko erakundeetako ordezkarien bisita jaso du gaur hiriak. Bisita nazioarteko topaketak antolatzen dituen jardueren barruan kokatzen da, eta helburua da bertan ezagutzea zahartze aktiboaren, parte-hartze sozialaren eta edadismoaren aurkako borrokaren arloko esperientzia berritzaileak eta jardunbide egokiak.

Barakaldo aukeratu izana hiriak Barakaldo Lagunkoiaren bitartez egindako lanari esker lortutako aintzatespenaren ondorio da. Barakaldo Munduko Osasun Erakundeak bultzatutako Hiri Lagunkoien Sarean integratutako udal-proiektua da.

Azken urteotan, Barakaldo esparru horretako erreferentzia gisa finkatu da, adinekoen parte-hartze zuzenean oinarritutako metodologiari esker. Izan ere, pertsona horiek aktiboki laguntzen dute beharrak detektatzen eta hobekuntza-proposamenak egiten, hiria ingurune irisgarriagoa, inklusiboagoa eta atseginagoa izan dadin.

Foroan parte hartu duten pertsonen artean interes gehien piztu duen proiektuetako bat 'Nire adinak ez nau definitzen' kanpaina izan da, zahartzearen irudi positiboa sustatzen duten benetako testigantzen eta belaunaldien arteko ekintzen bidez edadismoari aurre egiteko bultzatutako ekimena.

Amaia del Campo Barakaldoko alkateak harrera instituzionalean nabarmendu duenez, "aitorpen hau gure hiriko adinekoena da, Barakaldo Lagunkoian aktiboki parte hartzen baitute eta egunero udalerri gizatiarragoa, inklusiboagoa eta irisgarriagoa eraikitzen laguntzen baitute".

"Edadismoari aurre egitea erantzukizun kolektiboa da. Hirietan, pertsona guztiek, adina edozein dela ere, beren bizi-proiektua baldintza berdinetan garatu ahal izateko espazioak sortu behar ditugu", adierazi du Del Campok.

Jardunaldian zehar, nazioarteko ordezkaritzak Barakaldo Lagunkoiako boluntarioekin lankidetzan Udalak bultzatutako hainbat ekimen ezagutu ditu, baita parte-hartze soziala, belaunaldien arteko harremanak eta adinekoen autonomia sustatzeko egindako ekintzak ere.

"Bisita honek sendotu egiten du Barakaldo zahartze aktiboko politiken garapenean erreferentea den hirietako bat bezala duen posizioa, eta indartu egiten du adin guztientzako ingurune lagunkoiak eraikitzearekin konprometitutako udalerrien nazioarteko sarearen barruan duen eginkizuna", amaitu du alkateak.